這一群人，在廣州「打橫行」！

有一種人，有一種行為，我哋見一次就會㷫一次！而且毫不誇張咁講，只要我哋行出屋企門口，每日都會見到呢種人，佢哋就係——

「打尖」呢種陋習，廣泛滲入中國每一寸土地，搭車搭電梯，甚至系去公廁，只要有人排隊嘅地方，就會有人打尖兼隊。

今日就同大家傾下，喺廣州見到有人打尖，如何禮貌咁勸佢排隊！

01

老城區好多巴士站都只有一塊公交牌，就算人人都好有素質，排起條隊，巴士嚟到，就當排隊嘅人“冇到”，直接行去車門，成為第一個上車嘅人！

呢個時候，就可以同佢講：“哇，真系「跛腳鷯哥自有飛來蜢」咯，唔使排隊都第一個上車，下次帶攜下我啦！”

✎跛腳鷯哥自有飛來蜢：無能的人，也會有送上門的好運氣。

02

夠厚麵皮打尖嘅人，都唔會驚啲閒言閒語，所以就要加強語氣。

如插隊者系本地人，可以同佢講：“喂喂喂，唔該排隊喇，你以為「本地姜」最辣你啊？”（意思：不要丟廣州本地人的臉）

如插隊者系外地人，可以同佢講：“喂喂喂，唔該排隊喇，你以為「本地姜真系冇嚄辣」啊？”（意思：廣州人不是好欺負的）

✎本地姜唔辣：什麼東西都覺得外地（進口）的好。

03

地鐵入邊更多人打尖！明明有分“下車區”同“上車區”，但系佢哋就鐘意去冇人嘅“下車區”。

呢個時候，可以同佢講：“阿生，咪「蹅錯腳」啊，你嗰邊系落車區啊！”

✎蹅ca5錯腳：比喻不小心犯了錯。

04

除咗公交地鐵之外，就連快餐店食飯都會有人打尖！

肚餓嘅你，一定要同佢講：“阿生，「花燈好睇亦要油」嘎，想早啲食飯，咪早啲出門口咯。”

✎花燈好睇亦要油：比喻什麼東西都要成本，都要付出代價。

05

每個用過“自助充值機”充羊城通嘅自己友，都會有呢個體會：幾時去充卡都好，你充緊嗰時，肯定會有條友企喺你隔離，睇住你充羊城通，連輸密碼都會望到實一實！

無奈之下，只可以同佢講：“呢位哥哥，你喺度睇咩呢？「番鬼佬睇榜」啊？隊頭隊尾掉轉睇，呢度隊頭嚟嘎，你快啲返去隊尾排隊喇。”

✎番鬼佬睇榜：過去中國人書寫是從右到左，洋人相反。所以舊時的排行榜，中國人看的倒數第一，就是洋人看來就是正數第一。

06

對好多人嚟講，80%嘅打尖都可以忍，唯獨帶住小朋友都要打尖，最唔可以忍！

每次見到都要講：“阿姨，湊住個孫就乖乖哋排隊啦，細路哥「跟住好人學好人 跟住南無學拜神」，咩都學嘎！”

✎跟住好人學好人，跟住南無學拜神：指小朋友愛模仿別人，分不清好壞。

07

去到火車站買票，打尖現象更加猖狂。

每次都忍唔住要開口：“小姐，你一下子打咗幾十人尖，仲咁滋油淡定，系咪即系我哋「開埋井畀你食水」啊？”

✎開埋井畀人食水：比喻自己作出努力，卻讓別人得到好處。

✎滋油淡定：淡定。

08

醫院掛號，同樣系打尖重災區！親身遇到過某地老人家恃住自己年紀大，話佢打尖仲大大聲！

有首詩，好啱同佢哋念一念：“阿伯，念首詩你聽啦，「唔怕犯天條，至怕犯眾憎。面系人家畀，架系自己丟」啊！”

✎唔怕犯天條，至怕犯眾憎：最怕得罪群眾，讓群眾憎恨。

✎面系人家畀，架系自己丟：指咎由自取。

09

有啲鍵盤俠，口頭上都斥責排隊打尖嘅行為，但系轉下眼，自己都去打埋一份。

對呢啲鍵盤俠就可以講：“你都幾好嘢喔，揸住碌「盲公竹」周街走！「唔食狗肉撈狗汁」，你就開胃喇！”

✎盲公竹——督人唔督己：指只約束他人，不約束自己。

✎唔食狗肉撈狗汁：諷刺自稱不吃狗肉的人，卻用狗肉汁拌飯，比喻自欺欺人的行為。

「打尖特工隊」之所以咁有恃無恐，系因為大多數人見到打尖行為無動於衷，選擇忍耐。打尖唔會畀人鬧，唔使負責任，所以佢哋就更加猖狂！

換句說話講，我哋嘅忍耐，就係「打尖特工隊」嘅幫凶。

因此，為咗廣州可以更美好，下次見到有人打尖，大家都應該勇敢同佢講：“唔該排隊喇，你以為「仲有嗰支歌仔唱」啊？”

✎冇嗰支歌仔唱：比喻過去的美好不會再發生。

最後做個小調查

你今日有冇畀人打尖？