外地人成日以為廣州人,每朝都飲茶、每日都好得閒、衣著隨便但好有錢...對於呢個問題,最後澄清一次,廣州真繫有咁嘅人!
佢哋嘅名叫做退休老人!
除咗日日飲茶之外,退休老人仲有好多唔同嘅生活方式,而且佢哋仲會做好多後生仔理解唔到嘅事!
01
每次路過公園,都見到成村退休阿叔阿嬸開枱打牌,仲要真金白銀攞出嚟賭,拖住個小朋友我都唔敢行入公園。
02
有啲老人家買份報紙去飲茶,成個朝早就霸住一張枱,淨系叫個包、點籠燒賣,壺茶衝咗成朝,乜味都冇晒,諗住禮拜去飲餐晏茶都難。
03
最怕同啲老人家傾計,兩句未傾埋,阿叔又講返幾十年前打仗啲威水史,阿嬸又話以前下鄉幾咁辛苦……來來去去都系嗰三幅被,講咁多次,唔厭嘎?
✎來來去去三幅被:來來去去都是說這些。
04
最唔理解嗰啲鐘意養“鷯哥”嘅阿伯,成屋都系“鷯哥”,唔可以養第二種咩,吵冤巴閉。有啲阿伯又鐘意收藏紫砂壺,成間屋都系紫砂壺,唔貴嘅都唔買,成千銀一個茶壺仔,仲唔知真定假。
✎鷯哥:八哥
✎吵冤巴閉:形容十分吵鬧。
05
屋企樓下嗰班阿叔阿嬸,真系買佢哋怕。朝早《小蘋果》,晚黑《帝女花》。做完健身操,跟住就交際舞!二胡橫笛配樂,孫仔孫女助興。想出年同個孫一齊上春晚咩。
✎買(某人)怕:指怕了某人。
06
太迷信!有咩事寧願求神拜佛燒衣紙。又信埋啲開光保平安,條頸有個觀音,隻手又有串佛珠,銀包裡面都擺埋三四個平安符。
07
次次去親旅遊,一個景點影十幾廿張相。群發全部親戚群,下下都幾十條信息,全部都系圖片,流量唔使錢咩。
08
仔女未有打算結婚,咪由得佢咯。成日都大鑼大鼓搵人相睇。呢個都算喇,次次都系隔離村阿炳、村頭阿強、隔離屋阿鳳...
以上,都系廣州退休老人嘅生活日常。或者你會覺得佢哋得閒冇事做,會覺得佢哋太多管閒事
正當我哋批判呢啲老人家嘅時候,有冇發覺,佢哋可能就係我哋嘅阿爸阿媽。
老人家之所以會用我哋理解唔到嘅方式消遣,其實系因為我哋都用敷衍去傷害老人家。
喺我哋返工嘅時候,佢哋落公園打牌,但我哋放工返屋企,就喺度打王者。
喺我哋返工嘅時候,佢哋去飲茶,但我哋週末放假,寧願排隊買喜茶。
老人家收埋一屋“無謂嘢”,但我哋都買咗好多模型公仔。
我哋怪老人家拜神迷信,但我哋都將Idol當神咁拜!
So,你仲好意思批判呢啲老人家嗎?
你仲有藉口唔陪阿爸阿媽飲茶嗎?
P.S.可能你唔知,今個星期六就係重陽節。人人都話重陽節要敬老,不過,敬老唔應該揀時間!阿媽都唔會等兒童節先錫個仔啩。