正當廣州嘅盛夏，每日8杯水，汗都流返8杯，熱到連飯都冇胃口食...
原本諗住落場大雨降降溫，點知氣象局中午發佈預警，“學校停課、企業（應）停工”...望一望辦公室裡面嘅領導，當呢條預警冇到，剩低嘅小小胃口都冇埋...
雖然冇胃口，但中午都系要食嘢嘅！飯，食唔落；粥，食唔飽；炒粉，太乾；湯麵，太齋；腸粉，太鹹...（我哋羊城網嘅人，食飯就係咁難服侍！）...
難服侍：挑剔，難滿足。
不過，作為業餘美食愛好者嘅我，未到一分鐘，我就揀好咗“好入口、食得飽、唔覺齋、唔重口”嘅美食——瀨粉！
laai6 fan2
瀨 粉
瀨粉呈圓條手指狀，短而粗。最早產於1850年代嘅中山。
早期製作瀨粉系用稠米漿放入特定嘅壺，喺滾水上方傾倒，米漿從孔中“瀨”出又長又韌嘅粉條，入水遇熱即成狀，得名為瀨粉。
後來改為先煮熟米粉，搓成粉團放喺槽孔中，用木塞擠壓出粉條。瀨粉製成之後，要放入冷水中沖洗，然後再煮食。
可能你會懷疑，瀨粉“好入口、食得飽、唔覺齋、唔重口”，真系咁緊要？
絕對冇老點！傳統廣州瀨粉用豬骨湯+米漿做成濃稠湯底，加入花生、蝦米、叉燒、冬菇、油渣、蘿蔔粒做配料。瀨粉軟糯，但唔會滯。肉唔多，但肉香濃，好入口，更加好消化！
緊要：意思同“厲害”。
老點：欺騙。
滯：飽膩感。
單食一碗齋瀨粉，雖然食得飽，但齋瀨粉味道偏淡，可能會覺得有啲齋、唔夠喉，為咗令瀨粉嘅口感升級，嗜肉如命嘅廣州人加入叉燒、燒鵝、牛丸...瀨粉變成一碗冇飯嘅“碟頭飯”，一個字：絕！
唔夠喉：不過癮。
絕：意思同“厲害”。
叉燒瀨
▼▼
燒鵝瀨
▼▼
有人鐘意叉燒瀨、燒鵝瀨，一啖瀨粉一啖肉。都有人鍾情於齋瀨粉，加少少鹹菜、少少蔥，享受脣齒間嘅“濃香軟滑”。好多外省朋友拗爆頭，諗唔明廣州人點解鐘意食咁“傑”嘅瀨粉。
拗爆頭：苦思冥想。
傑：粘稠。
呢個問題，全廣州最出名嘅文明路“老西關瀨粉”嘅老闆伍文輝咁樣迴應：我哋西關就係咁食嘅，你鐘意食就嚟食，唔鐘意就食其他！
老西關瀨粉
▼▼
好多人都話“粵菜沒落”，瀨粉其實都系其中之一。
曾幾何時，橫街窄巷都有瀨粉坐鎮，街邊走鬼都有瀨粉嘅濃香。
時至今日，老廣想食瀨粉舉步維艱，後生一輩偏愛拉麵同意粉。
曾經有人建議伍先生，將瀨粉湯底“調稀”，加入辣、酸辣口味，但伍先生都一一回絕，堅持傳統做法，佢始終相信：鐘意食嘅人，一定會返嚟食！
蔡瀾先生為“老西關瀨粉”題字
▼▼
對於“粵菜沒落”呢個命題，魯迅先生多年前嘅一句話，已經總結咗原因：
「粵菜本沒有沒落，吃的人少了，也就成了“沒落”。」
相關推薦
