七月十四臨近，你應該注意什麼？

相傳鬼節午夜，鬼門剛好全開，野外百鬼幽遊，屬全年至陰！冇乜事都唔好出街，早啲返歸瞓覺！

好多人都以為七月十四鬼節先系重頭戲，但傳統觀念強小小嘅廣府人（我阿媽）認為，鬼節應該叫做“鬼月”！

踏入農曆七月，鬼門開始慢慢打開！歷時十四日，鬼節當日鬼門全開，過後直至七月廿九，鬼門再慢慢關閉...（鬼門從開啟到關閉，整好一個月，所以叫鬼月）。

二十一世紀，咩都要講科學。但每逢農曆七月，親愛嘅媽咪都會提醒我哋：早啲返屋企啦！（並非所有廣府人都會這樣...）除咗“早啲返屋企”之外，七月仲有啲乜嘢禁忌？

七月外出出遊又好、拜祭先人又好、喺高速路塞車都好，如果冇廁所，人有三急千祈咪亂嚟！若然真系忍唔住，搵個角落，“開火”之前講三聲“唔該借過，唔該借過，唔該借過”！

鬼都系講道理嘅，你對佢有禮貌，佢都會禮貌對你！招呼都唔打聲，直接開火，咪話鬼，佛都有火啦！

據說鬼鐘意靠牆休息（因為牆冰冷涼爽），沿住牆邊行，或者挨住牆，可能會打擾到佢哋休息。都系嗰句：你對佢有禮貌，佢都會禮貌對你！

人身上有三把火（有人說是“三盞燈”），左右膊頭、頭頂各一把。七月裡面，唔好亂搭人膊頭，都儘量唔好畀人搭膊頭。萬一搭熄咗把“火”，就容易成為遊魂野鬼嘅目標！

農曆七月，好多人會喺路邊拜祭。結束之後，會將“祭品”留喺原地，供鬼享用。

呢個時候，無論見到地下有咩值錢嘢，就算系錢都好，都唔可以執！用嚟拜祭嘅食品更加唔可以食！同鬼爭嘢食，嫌命長！

不過，若然有張一百蚊喺地下......路人跌嘅啫，冇事嘅！

如果朝早洗衫，朝早晾，最好天黑前收衫。習慣夜晚洗衫嘅自己友，最好就第二日再晾衫，鬼鐘意陰涼，小心畀鬼“借衫著”！

農曆七月，夜晚出街，無論自己一個人，定系同朋友出去，如果隱隱約約聽到背後有人叫你個名，都唔好回頭，因為有可能系只鬼呼喚緊你！

就算聽到你暗戀嘅男仔/女仔把聲，都唔好回頭，話知佢嬲又好，要絕交又好，大不了咪打個電話say sorry...

就好似阿媽由細到大都同你講：唔好咁夜返！鬼門開，加上夜晚陰氣上升，對於遊魂野鬼嚟講，反而鬼氣變旺，陽氣不足嘅自己友最好都系趁早返屋企啦！

所以呢個月，大家儘量唔好夜蒲、唔好加班啦...

點講都好，呢啲都系冇科學根據嘅講法，只系上一輩流傳落嚟嘅文化，信則有，不信則無。不過，阿媽叫你早啲返屋企，你咪聽下佢話咯，有蝕底咩？