新編粵語童謠（外一首）《仍在跋涉》（7）
伍慶祿
配圖：李兆逑
（一）
鷯哥謠（注）
的的篤，的的篤，
你敲木魚我唱歌。
騮崗山上多鷯哥，
會講人話會唱歌。
今日沙田好風光，
荷香十里傳碧波。
水清沙靚浮白鵝，
蝦蟹鱔魚一窩窩。
種田捕魚都豐收，
家家安樂笑呵呵。
細路哥，細路哥，
咪燒炮仗嚟嚇我。
唔敢喂仔冇陰功，
餓死我啲花鷯哥。
注：番禺東衝鎮有岡曰騮崗，周邊灘塗連綿，魚蝦成窩，峭壁上鷯哥窩甚多，鷯哥毛花白色，俗稱花鷯哥。孩童惡作劇，常放鞭炮驚嚇成鳥，不讓喂雛。
（二）
睇牛仔
舊時睇牛仔，今日阿的哥。
問佢舊時事，就唱睇牛歌。手執牛繩冇奈何，水浸田基無地坐。水浸基圍無地踎（注1），走上高山坐一坐。牛仔食人禾，畀（注2）人鬧（注3）得多。過嚟（注4）一個老婆婆，開口就唱歌。有就畀，冇就畀一啲咁多（注5）。我係睇牛仔，好比問和尚攞（注6）梳。
問佢今日事，手扶車舵話多多。舊日河衝變通衢，禾田變晒工業區。到處都系屋連屋，荷包腫脹扶貧濟困手唔縮，低頭嘆氣環境破壞好氣谷（注7）。
注1：踎：蹲。注2：畀：給。注3：鬧：罵。注4：嚟：來。注5：一啲咁多：一點點。注6：攞：要。注7：谷氣：氣悶。
（三）
蕉林夜雨
月光光，映晚霞，
村裡頭，啼暮鴉。
阿哥阿姐約好啦，
齊齊嚟到蕉樹下。
真好笑，真好笑，
一個話摘花，
一個話摘瓜。
嘩啦啦，嘩啦啦，
天黑晒，落雨啦。
風吹蕉葉舞婆娑，
雨打芭蕉聲沙沙 。
拉塊蕉葉遮住頭，
正好匿埋（注）談心啦。
注：匿埋：藏起來。
（四）
荷塘月色
月光光，照荷塘，
家姐夜晚會情郎。
荷葉光，荷花香，
摘塊荷葉送情郎。
低頭捻（注）辮叫哥哥，
情絲邊個長。
注：捻：用手指搓轉.
（五）
落雨大
落雨大，冇（注1）浸街，
阿哥阿嫂搵（注2）交嗌（注3）。
一個話落田，
一個話行街。
問下佢（注4）點解（注5）？
今晚飲喜酒，
行街買花戴。
咪浸死禾秧，
落田把水排。
哎呀呀，哎呀呀，
咁（注6）樣的小事，
各行各的啦。
成日嘈交嗌，
一啲（注7）都唔乖。
注1：冇：沒有。 注2：搵：找。注3：嗌交：吵架。注4：佢：他。
注5：點解：為什麼。注6：咁：這麼。注7：啲：一點點。
（六）
年卅晚
煎堆碌碌，
金銀滿屋。
細路哥（注1），咪亂鬱（注2）。
聽朝早（注3），拜神接福。
煎堆碌碌，
金銀滿屋。
細路哥，咪亂鬱。
幫手磨墨寫揮春，
平安幸福貼滿屋。
注1：細路哥：小孩子。注2：咪亂鬱：不要亂動。注3：聽朝早：明天早上。
（七）
豎中秋
八月十五豎中秋，
有人歡喜有人愁。
月光高懸照樓臺，
天棚擺枱拜月神。
閤家歡聚樂悠悠，
寂寞嫦娥淚流流。
八月十五豎中秋，
家家歡喜有人愁。
碌柚楊桃番石榴，
天棚擺枱拜月神。
細路仔，
拎起燈籠到處走。
吮住田螺搵法海，
我同你鬥。
(八)
氹氹轉
青草地，紅花映，
雀仔唱，松鼠迎。
春風拂面魚遊淵，
老師帶我去公園。
手拉手，好朋友，
繃緊衫尾氹氹轉。
氹氹轉，菊花園，
炒米餅，糯米糰，
阿媽叫我睇龍船。
（九）
落雨咪咪（注1）
落雨咪咪（注2），
水浸田基。
田基有條蛇，
唔敢見老爺。
落雨咪咪，
水浸田基。
搭起大戲臺，
家家有才又有財（注3）。
注1：番禺東衝鎮石牌村有座天后宮，傳說這裡每年舉行酬神演戲時都會下起毛毛雨，人們都說這是天后和龍王爺顯靈，庇護人間。有一年當地大水氾濫成災，說起來奇怪，無論水再大，淹了周圍的許多民房，就是淹不了天后宮，天后宮周圍水裡有許多蛇在遊動，但沒有一條敢爬進天后宮裡。注2：咪咪：小小狀。注3：天后宮建成後，附近居民紛紛添丁發財，還有讀書成名的。
（十）
雞公仔
雞公仔，尾婆娑，
三歲孩兒學唱歌，
唔使爹孃教導我，
老師識嘢（注）一籮籮。
雞公仔，尾婆娑，
跟住老師學唱歌。
唱完歌仔分果果，
學下孔融好哥哥。
大嘅分畀你，
細嘅留畀我。
注：嘢：東西。
（十一）
娶老婆（注1）
拍大髀（注2），唱漁歌，
人人話我冇（注3）老婆。
的起（注4）心肝娶番個，
沙煲 兄弟打茅波（注5）。
睇中尾嬌嬌女，
偷天換日娶個靚老婆。
佢唔奀（注6），我晤 賴。
夫妻齊心共建安樂窩。
注：①番禺東湧民間流傳這樣一個故事，說的是民國末年當地沙尾村發生的一個名叫志根的跛腳青年以騙婚開始，以 美滿結局的姻緣故事。②大髀：大腿。③冇：無。④的起：發起。⑤打茅波：打耍賴的球。⑥佢：他。⑦唔奀：不差。
外一首 今日東湧好地方（鹹水歌）
廣州南沙區東湧鎮，是珠江千年浮沙所成，南宋始有圍墾，至明末清初成型。鎮中心區古稱吉祥圍，距廣州中心城區約40公里。歷史上這裡是番禺地區比較貧困的地方，居民以疍家人為主。改革開放後，這裡的面貌發生了天翻地覆的改變。未來東湧鎮發展規劃為：高技術服務業、教育培訓業、高新技術產業、高端醫療產業和汽車製造業。
男：叫聲好妹妹呀呢（“呢”讀“呢喃”的呢），你棹艇棹得好辛苦呀呢。唱支鹹水歌畀（注1）哥聽下呀呢？
女：海底蝦微(尾平音)（注2）好似啊哥老又契（注3）呀呢，五洋大海系哥山墳呀呢。點解要妹我唱歌畀你聽呀呢？
男：叫妹買個絲瓜做晚夜菜呀呢，叫妹偷龍轉鳳送哥宵夜呀呢。
女：大哥上東落西無影腳呀呢，絲瓜冇（注4）絲唔會牽掛呀呢，竟然叫妹做宵夜呀呢。啊哥廣州冇老婆，十足火船冇舵呀呢。火船無舵叫哥點樣行船呀呢？
男：鐵打心肝畀妹引壞我呀呢。桄榔大樹勢無畀妹挨斜（注5）呀呢。叫聲妹妹呀呢，妹冇老公哥冇老婆，不如跟我落（注6）廣州打工捱世界（注7）呀呢，妹啊妹啊你又願唔願意呀呢？
女：系我東湧好地方呀呢，點解要跟你去廣州捱世界呀呢？阿哥有情就嚟我東湧呀呢，大把世界你撈呀呢。
男：我怕日晒我怕雨淋呀呢，成個卜佬咁樣（注8）畀人笑呀呢。
女：手執熨斗燙你個爛臭口，今日東湧唔同往時呀呢！落田有機器，出門有的士呀呢；落雨又唔會淋溼頭呀呢；空氣冇汙染，食有農家菜呀呢；悶有卡拉OK歌舞廳，畀你唱畀你跳呀呢，悠閒仲有“綠道”俾你行呀呢；四圍有超市，沖涼用香波，洗頭有玉蘭油呀呢。一啲（注9）都唔比你廣州差呀呢。阿哥有意落嚟睇下妹呀呢，高樓兩幢任哥住呀呢。
合唱：今日東湧好地方呀呢！如意吉祥！如意吉祥！歡迎嚟東湧呀呢！合力東湧！合力東湧！再創威煌！再創威煌！日日大變樣呀呢！
注1：畀：給予，《詩•小雅•巷伯》：“取彼譖人，投畀虎豹。” 注2：蝦微：小蝦。 注3：契：愁苦貌，出《詩·小雅•大東》：“契契寤嘆，哀我悼人”，毛傳：“契契，憂苦貌也.” 注4：冇：沒有。高亨注：“畀：給予。” 注5：挨：依靠，挨斜：靠歪了。 注6：落：來。 注7：捱世界：熬日子的意思。 注8：卜佬：粵地新方言，拿鋤頭的人，卜，像鋤頭形。 注9：一啲：一點點。
文友：吳墨 頗下功夫的文字。我雖不懂詩歌，但尚能體味其意義和意境，也能感悟你不凡的造詣。真不容易的構思和創作。