《使徒行者2》御用收數佬黃文標撈足23年 離巢北漂：至少被尊重

看《使徒行者2》，會見到很多熟悉但久違多時的臉孔。就好比第二集，就見到「御用收數佬」黃文標。雖然只有短短十五分鐘戲份，但是觀眾看到他都覺得熟口熟面。其實他2012年離開了工作了23年的TVB，多翻轉折，簽過HKTV，未能發牌之後等待約滿，正式成為自由人。

黃文標形容現時是「炒散」生。「炒散」相對在TVB，工作比較不穩定，標哥表示勉強過得到生活，但至少可以自由選擇工作，但所謂自由選擇，還是多多爭取機會：「自由身最想都係北望神州，希望賺多啲人仔，等自己鬆動啲，不過而家都主要拍下網劇同電影。」據知他曾與麥包合作拍過網上電影《香港風雲系列之教父》，雖然撈散之後，所做的角色依然離不開奸人、收數，但黃文標滿意現時狀態，不介意自己走得遲：「咁我本身份人冇所謂嘅Planinng嘅，唔會刻意追求啲咩生活。」

一見到黃文標，就會諗起佢做開奸人。

因此，黃文標成為自由身後，為了接觸不同製作單位，就算學生project拍片，他都一一答應：「有時候學生同我講冇budget，我都會酌量，剩係收返車馬費。」可是這樣做，不會想加價嗎？他說：「咁我都會一年一年咁去調整自己個價嘅！但係對比起以前，而家真係做到好多嘢。」他後來提起TVB時，確實試過一年接300幾個Show，可是往後日子，戲份越來越少，出show已經買少見少，有時還要減show：「其實之前有做過幾個戲份重嘅角色，但係之後每套劇，我都係得個一、兩集戲份，有時仲要被人hold起，劇組嘅人搵我，話我會拍一、兩集劇，但套劇完咗我都未開工，就係咁我都接唔到show。」莫講話接show，外面有人找黃文標拍電影，往往因為只得數集戲份，卻又被hold了一段長時間：「就算我想出去拍嘢，都係為咁咩都做唔到，呢個都係當中嘅張限制。」黃文標現在可自行安排工作，所以還會偶爾做副業：「我有朋友係賣海鮮，有時候都會幫下手做司機，賺下外快。咁佢ok，我就ok㗎喇。」

黃文標歎曾經被公司HOLD住工作，搞到冇SHOW接。

為TVB效力了23年才往外闖，黃文標不認為自己走得遲：「又唔可以一味講舊公司嘅唔好，佢又真係幫到我去建立個形象，係一見到我就會話：『哦！佢成日做收數佬』，都至少仲有認得，而唔係做咗20幾年行過冇人記起。」不過，黃文標講起在TVB的日子，他坦言實在沒有半點實在成就：「真係講唔出有咩成就，最多咪話我係『御用乜乜乜』囉！其實有個事實就係喺入面，真係七分靠運氣三分演技，過往我試過做戲份重嘅角色，監製可能覺得我做得唔好，之後做返一般角色，我都有去檢討自己。但係有唔少演員，都付出好多努力，好似古明華咁，佢做嘅蘇基真係好出色，但之後又好似冇人記起…當中係點我就唔評論咁多喇，但而家我都會去勤力啲，拍多啲唔同嘅嘢。」

50歲才出去闖，黃文標沒有介意甚麼。

黃文標離開TVB後，感受到拍劇時，待遇有明顯分別，他說：「至少個價錢，係一個被尊重嘅價錢。」就算是工作人員，都比較有禮貌：「好多時候，啲工作人員唔係長期合約，態度都會比較客氣，絕對唔係老奉。」提到老奉，以為黃文標曾經受過氣，但原來他覺得最難受的說話，是被人揶揄是茄哩啡：「唔知點解我好唔鍾意呢三個字，我覺得呢個字真係好貶義，唔係要叫我做明星，我只不過係演員，但係我對住臨時演員，都唔會話佢係茄哩啡，叫佢做演員係一個尊重。」所以他往外闖後，發覺內地的人反而比香港人更客氣，會以「老師」稱呼他。